مانا کہ دور زیست بڑا پر فتن رہا

مانا کہ دور زیست بڑا پر فتن رہا

لیکن جنوں تو اپنی ہی دھن میں مگن رہا

اک زندہ بت کے مرمریں پیکر کے سامنے

بے رنگ و بے نمود اجنتا کا فن رہا

ہے اب ادب میں زور نئے تجربات کا

اب فکر رہ گئی ہے سلامت نہ فن رہا

کچھ مسئلے حیات کے اب تک نہ حل ہوئے

پر پیچ ان میں سب سے ہی آواگمن رہا

کانٹوں سے بچ گیا تو ہوا لے اڑی اسے

ثابت بدن پہ کس کے یہاں پیرہن رہا

ہر شخص کچھ نہ کچھ اسے کہتا رہا مگر

بوڑھا فقیر اپنی ہی دھن میں مگن رہا

مرجھا گئی کلی تو یہ دی خار نے صدا

اب بول تو کہاں پہ ترا بانکپن رہا

بجھتے ہی لو چراغ کی مٹی مہک اٹھی

بجھ کر بھی وہ چراغ سر انجمن رہا

ہر بار سوچتا ہوں کہ بیدلؔ میں کیا لکھوں

پہلا سا اب کہاں وہ مذاق سخن رہا