mana ki daur-e-zist baDa pur-fitan raha

maanā ki daur-e-zīst baḌā pur-fitan rahā

lekin junūñ to apnī hī dhun meñ magan rahā

ik zinda but ke marmarīñ paikar ke sāmne

be-rang o be-numūd ajantā kā fan rahā

hai ab adab meñ zor na.e tajrabāt kā

ab fikr rah ga.ī hai salāmat na fan rahā

kuchh mas.ale hayāt ke ab tak na hal hue

pur-pech in meñ sab se hī āvāgaman rahā

kāñToñ se bach gayā to havā le uḌī use

sābit badan pe kis ke yahāñ pairahan rahā

har shaḳhs kuchh na kuchh use kahtā rahā magar

būḌhā faqīr apnī hī dhun meñ magan rahā

murjhā ga.ī kalī to ye dī ḳhaar ne sadā

ab bol tū kahāñ pe tirā bāñkpan rahā

bujhte hī lau charāġh kī miTTī mahak uThī

bujh kar bhī vo charāġh sar-e-anjuman rahā

har baar sochtā huuñ ki 'bedil' maiñ kyā likhūñ

pahlā sā ab kahāñ vo mazāq-e-suḳhan rahā

mana ki daur-e-zist baDa pur-fitan raha

lekin junun to apni hi dhun mein magan raha

ek zinda but ke marmarin paikar ke samne

be-rang o be-numud ajanta ka fan raha

hai ab adab mein zor nae tajrabaat ka

ab fikr rah gai hai salamat na fan raha

kuchh masale hayat ke ab tak na hal hue

pur-pech in mein sab se hi aawagaman raha

kanTon se bach gaya to hawa le uDi use

sabit badan pe kis ke yahan pairahan raha

har shaKHs kuchh na kuchh use kahta raha magar

buDha faqir apni hi dhun mein magan raha

murjha gai kali to ye di KHar ne sada

ab bol tu kahan pe tera bankpan raha

bujhte hi lau charagh ki miTTi mahak uThi

bujh kar bhi wo charagh sar-e-anjuman raha

har bar sochta hun ki 'bedil' main kya likhun

pahla sa ab kahan wo mazaq-e-suKHan raha