mana ki mera jism ye juTha gilas hai

maanā ki merā jism ye jūThā gilās hai

lekin ye dil to aaj bhī korā gilās hai

kitnī hai kaisī mai hai yahī baat hai baḌī

chāñdī yā kāñch kā sahī rahtā gilās hai

kuchh tishnagī bhī rakhnī thī jānāñ sañbhāl ke

tum ne hifāzatoñ se jo rakkhā gilās hai

piine kā lutf hai tabhī jab ye rahe na ilm

terā gilās hai ki ye merā gilās hai

qīmat to merī pyaas kī bhī kam nahīñ huzūr

ye aur baat aap kā mahñgā gilās hai

tum ko bhī is jahān kā aa hī gayā chalan

piine ke baad tum ne bhī pheñkā gilās hai

muñh se lagā maiñ pī gayā botal to shor kyoñ

shiddat kī pyaas ko kahāñ miltā gilās hai

duniyā kā maiñ zarūr huuñ par shaam hī talak

phir us ke baad to mirī duniyā gilās hai

mana ki mera jism ye juTha gilas hai

lekin ye dil to aaj bhi kora gilas hai

kitni hai kaisi mai hai yahi baat hai baDi

chandi ya kanch ka sahi rahta gilas hai

kuchh tishnagi bhi rakhni thi jaanan sanbhaal ke

tum ne hifazaton se jo rakkha gilas hai

pine ka lutf hai tabhi jab ye rahe na ilm

tera gilas hai ki ye mera gilas hai

qimat to meri pyas ki bhi kam nahin huzur

ye aur baat aap ka mahnga gilas hai

tum ko bhi is jahan ka aa hi gaya chalan

pine ke baad tum ne bhi phenka gilas hai

munh se laga main pi gaya botal to shor kyon

shiddat ki pyas ko kahan milta gilas hai

duniya ka main zarur hun par sham hi talak

phir us ke baad to meri duniya gilas hai