مانا کہ میرے پیار کو پتھر پسند تھا

مانا کہ میرے پیار کو پتھر پسند تھا

وہ شخص کیا ہوا جو بڑا درد مند تھا

شہر صدا کو رات کسی نے جگا دیا

ڈوبا ہوا سا درد میں وہ کس کا چھند تھا

کیسے وہ اس جہان کی وسعت کو دیکھتا

وہ آئنہ جو اپنے ہی کمرے میں بند تھا

کاسے کو درد کے نہ ملی چاندنی کی بھیک

حالانکہ میرا چاند بہت درد مند تھا

بھڑکی لہو کی آگ تو اندر سے جل گیا

احساس کا مکان جو باہر سے بند تھا

دیتے ہیں داد گل ترے آنچل کو تھام کر

کانٹوں کا حوصلہ بھی غضب کا بلند تھا

جس کے گلے میں نصف صدی کی صلیب تھی

اس لمحے کا تو راجؔ بھی احسان مند تھا