مانا کہ رات ہجر کی ماری نہیں رہی

مانا کہ رات ہجر کی ماری نہیں رہی

لیکن وہ رتجگوں کی خماری نہیں رہی

چاٹا ہے رات دن اسے میں نے اسی لئے

زنجیر میرے پاؤں کی بھاری نہیں رہی

موسم جو سارے میری حمایت میں تھے کبھی

ان موسموں سے اب مری یاری نہیں رہی

حیرت نہ کیجیے کہ ہمیں ہارنا ہی تھا

ملتی تھی جو کمک وہی جاری نہیں رہی

سسرال میں بھی پا نہ سکی ہو کوئی مقام

ماں باپ کی بھی اب وہ دلاری نہیں رہی

خوشبو سے جس کی جسم مہکتا تھا صبح و شام

اب عشق کی وہ باد بہاری نہیں رہی

میں کیا غزل لکھوں میں کوئی شعر کیا کہوں

جب مجھ پہ کیفیت ہی وہ طاری نہیں رہی