mana ki raat hijr ki mari nahin rahi

maanā ki raat hijr kī maarī nahīñ rahī

lekin vo ratjagoñ kī ḳhumārī nahīñ rahī

chāTā hai raat din use maiñ ne isī liye

zanjīr mere paañv kī bhārī nahīñ rahī

mausam jo saare merī himāyat meñ the kabhī

un mausamoñ se ab mirī yaarī nahīñ rahī

hairat na kījiye ki hameñ hārnā hī thā

miltī thī jo kumak vahī jaarī nahīñ rahī

sasurāl meñ bhī pā na sakī ho koī maqām

maañ baap kī bhī ab vo dulārī nahīñ rahī

ḳhushbū se jis kī jism mahaktā thā sub.h-o-shām

ab 'ishq kī vo bād-e-bahārī nahīñ rahī

maiñ kyā ġhazal likhūñ maiñ koī she'r kyā kahūñ

jab mujh pe kaifiyat hī vo taarī nahīñ rahī

mana ki raat hijr ki mari nahin rahi

lekin wo ratjagon ki KHumari nahin rahi

chaTa hai raat din use main ne isi liye

zanjir mere panw ki bhaari nahin rahi

mausam jo sare meri himayat mein the kabhi

un mausamon se ab meri yari nahin rahi

hairat na kijiye ki hamein haarna hi tha

milti thi jo kumak wahi jari nahin rahi

sasural mein bhi pa na saki ho koi maqam

man bap ki bhi ab wo dulari nahin rahi

KHushbu se jis ki jism mahakta tha subh-o-sham

ab 'ishq ki wo baad-e-bahaari nahin rahi

main kya ghazal likhun main koi she'r kya kahun

jab mujh pe kaifiyat hi wo tari nahin rahi