mana ki sai-e-ishq ka anjam-kar kya

maanā ki sa.i-e-ishq kā anjām-kār kyā

be-iḳhtiyār dil pe magar iḳhtiyār kyā

har zarra āshiyāna-e-dil hai kahīñ Thahar

sahrā-e-zindagī meñ talāsh-e-diyār kyā

shāyad ki shahr meñ koī insān aa gayā

dekho hujūm sā hai sar-e-rahguzār kyā

sadiyoñ kā zahr pī ke jo so.e vo kyā uThe

Dastī hai zindagī kī ḳhalish bār-bār kyā

har zarra lāla-zār hai taaza lahū kī tarah

barsā hai is dayār meñ abr-e-bahār kyā

kyuuñ merī ḳhāk-e-dil kī taraf multafit haiñ log

kuchh ab bhī rah gayā hai diloñ meñ ġhubār kyā

fardā hai intizār meñ sadiyāñ liye hue

maazī ke māh-o-sāl tumhārā shumār kyā

māmūr hai nashāt-e-ġham-e-dil se zindagī

tujh ko 'shamīm' fikr-e-ġham-e-rozgār kyā

mana ki sai-e-ishq ka anjam-kar kya

be-iKHtiyar dil pe magar iKHtiyar kya

har zarra aashiyana-e-dil hai kahin Thahar

sahra-e-zindagi mein talash-e-diyar kya

shayad ki shahr mein koi insan aa gaya

dekho hujum sa hai sar-e-rahguzar kya

sadiyon ka zahr pi ke jo soe wo kya uThe

Dasti hai zindagi ki KHalish bar-bar kya

har zarra lala-zar hai taza lahu ki tarah

barsa hai is dayar mein abr-e-bahaar kya

kyun meri KHak-e-dil ki taraf multafit hain log

kuchh ab bhi rah gaya hai dilon mein ghubar kya

farda hai intizar mein sadiyan liye hue

mazi ke mah-o-sal tumhaara shumar kya

mamur hai nashat-e-gham-e-dil se zindagi

tujh ko 'shamim' fikr-e-gham-e-rozgar kya