مانا کہ شکل سے میں ذرا سا متین ہوں

مانا کہ شکل سے میں ذرا سا متین ہوں

لیکن ہنسی مذاق میں میں بہترین ہوں

کچھ وقت مجھ پہ کام ہوا پھر میں کٹ گیا

جو فلم تک پہنچ نہ سکا میں وہ سین ہوں

میں آدمی کی ذات گماں کیوں نہ ہو مجھے

کیوں کر بھرم نہ ہو کہ بس اک میں ذہین ہوں

خود تک عروج بھی مرا خود تک زوال بھی

یعنی ہوں میں ہی آسماں میں ہی زمین ہوں

دل ایک عقل دو وہ جو ان کو سنے وہ تین

میں ایک شخص ہوں ہی کہاں میں تو تین ہوں

توہین اتنی بھی نہ کر ان کی پسند کی

فانیؔ قبول کر لے کہ میں بھی حسین ہوں