mana ki sitare sar-e-aflak bahut hain

maanā ki sitāre sar-e-aflāk bahut haiñ

ham ko bhī hamāre ḳhas-o-ḳhāshāk bahut haiñ

khilte haiñ kidhar gul dil-e-sad-chāk bahut haiñ

dāman haiñ kahāñ dīda-e-namnāk bahut haiñ

itnā na hañso sāhab-e-idrāk bahut haiñ

āhista chalo log tah-e-ḳhāk bahut haiñ

miTne ko to miT jaate haiñ arbāb-e-mohabbat

iksīr haiñ is raah meñ kam ḳhaak bahut haiñ

jis rañg meñ chāhā tujhe us rañg meñ dekhā

lamhe tirī furqat ke tarab-nāk bahut haiñ

un ko bhī 'jamīl' apne muqaddar se gila hai

vo log jo sunte the ki chālāk bahut haiñ

mana ki sitare sar-e-aflak bahut hain

hum ko bhi hamare KHas-o-KHashak bahut hain

khilte hain kidhar gul dil-e-sad-chaak bahut hain

daman hain kahan dida-e-namnak bahut hain

itna na hanso sahab-e-idrak bahut hain

aahista chalo log tah-e-KHak bahut hain

miTne ko to miT jate hain arbab-e-mohabbat

iksir hain is rah mein kam KHak bahut hain

jis rang mein chaha tujhe us rang mein dekha

lamhe teri furqat ke tarab-nak bahut hain

un ko bhi 'jamil' apne muqaddar se gila hai

wo log jo sunte the ki chaalak bahut hain