mana ki tujh mein ye dil ab mubtala nahin hai

maanā ki tujh meñ ye dil ab mubtalā nahīñ hai

phir bhī hamāre haq meñ ye faisla nahīñ hai

dil toḌ kar vo merā samjhā rahā thā mujh ko

ye baat hai zarā sī koī mas.ala nahīñ hai

ham zindagī se thoḌā nā āshnā hue haiñ

ḳhatra to kam huā hai lekin Talā nahīñ hai

maiñ zindagī kī had se aage nikal to aayā

yaañ par ḳhalā hai likkhā lekin ḳhalā nahīñ hai

mere safar pa koī kaise yaqīn laa.e

koī rāhbar nahīñ hai koī aabla nahīñ hai

sūraj ke ghar meñ ham ne aañsū chhupā diye haiñ

kal raat ne kahā thā ab hauslā nahīñ hai

vahshat ko ḳhair jaano apne gale lagāo

ye rizq-e-āshiqī hai koī balā nahīñ hai

mana ki tujh mein ye dil ab mubtala nahin hai

phir bhi hamare haq mein ye faisla nahin hai

dil toD kar wo mera samjha raha tha mujh ko

ye baat hai zara si koi masala nahin hai

hum zindagi se thoDa na aashna hue hain

KHatra to kam hua hai lekin Tala nahin hai

main zindagi ki had se aage nikal to aaya

yan par KHala hai likkha lekin KHala nahin hai

mere safar pa koi kaise yaqin lae

koi rahbar nahin hai koi aabla nahin hai

suraj ke ghar mein hum ne aansu chhupa diye hain

kal raat ne kaha tha ab hausla nahin hai

wahshat ko KHair jaano apne gale lagao

ye rizq-e-ashiqi hai koi bala nahin hai