mana ki use humse kabhi pyar nahin tha

maanā ki use ham se kabhī pyaar nahīñ thā

zālim magar itnā bhī dil-āzār nahīñ thā

ham jis se tavaqqo' pe manāne kī ḳhafā the

vo naam bhī sunñe kā ravādār nahīñ thā

madhoshī-e-ulfat meñ 'ajab be-ḳhabarī thī

dil hosh meñ aa kar bhī ḳhabar-dār nahīñ thā

sochā thā kaḌī dhuup meñ yāroñ ke mahal haiñ

dekhā to kahīñ sāya-e-dīvār nahīñ thā

ġham aur bhī the yuuñ to ġham-e-yār se pahle

aisā bhī magar hāl-e-dil-e-zār nahīñ thā

ye talḳh haqā.eq bhī haiñ apnoñ hī se mansūb

ġhairoñ meñ koī dar-pa-e-āzār nahīñ thā

kaam un se paḌā 'bazm' ki jin fitna-garoñ se

jī baat bhī karne kā ravādār nahīñ thā

mana ki use hum se kabhi pyar nahin tha

zalim magar itna bhi dil-azar nahin tha

hum jis se tawaqqo' pe manane ki KHafa the

wo nam bhi sunne ka rawadar nahin tha

madhoshi-e-ulfat mein 'ajab be-KHabari thi

dil hosh mein aa kar bhi KHabar-dar nahin tha

socha tha kaDi dhup mein yaron ke mahal hain

dekha to kahin saya-e-diwar nahin tha

gham aur bhi the yun to gham-e-yar se pahle

aisa bhi magar haal-e-dil-e-zar nahin tha

ye talKH haqaeq bhi hain apnon hi se mansub

ghairon mein koi dar-pa-e-azar nahin tha

kaam un se paDa 'bazm' ki jin fitna-garon se

ji baat bhi karne ka rawadar nahin tha