mana ki zindagi mein kuchh achchha nahin kiya

maanā ki zindagī meñ kuchh achchhā nahīñ kiyā

lekin zamīr kā kabhī saudā nahīñ kiyā

rusvā hue haiñ ḳhud use rusvā nahīñ kiyā

chup-chāp khaa.e zaḳhm tamāsha nahīñ kiyā

sajde meñ jab jhukāyā to dil se jhukāyā sar

ham ne vafā kī raah meñ dhokā nahīñ kiyā

shāyad tarāsh kar mujhe mūrat banā.e vo

patthar se ḳhud ko is liye shīsha nahīñ kiyā

toḌe haiñ jaam taare gine badlī karvaTeñ

aa dekh terī yaad meñ kyā kyā nahīñ kiyā

Daste haiñ saare ḳhvāb jo bachpan meñ dekhe the

'ġhāfil' javānī meñ jinheñ puurā nahīñ kiyā

mana ki zindagi mein kuchh achchha nahin kiya

lekin zamir ka kabhi sauda nahin kiya

ruswa hue hain KHud use ruswa nahin kiya

chup-chap khae zaKHm tamasha nahin kiya

sajde mein jab jhukaya to dil se jhukaya sar

hum ne wafa ki rah mein dhoka nahin kiya

shayad tarash kar mujhe murat banae wo

patthar se KHud ko is liye shisha nahin kiya

toDe hain jam tare gine badli karwaTen

aa dekh teri yaad mein kya kya nahin kiya

Daste hain sare KHwab jo bachpan mein dekhe the

'ghafil' jawani mein jinhen pura nahin kiya