mana teri nazar mein tera pyar hum nahin

maanā tirī nazar meñ tirā pyaar ham nahīñ

kaise kaheñ ki tere talabgār ham nahīñ

sīñchā thā jis ko ḳhūn-e-tamannā se rāt-din

gulshan meñ us bahār ke haqdār ham nahīñ

ham ne to apne naqsh-e-qadam bhī miTā diye

lo ab tumhārī raah meñ dīvār ham nahīñ

ye bhī nahīñ ke uThtī nahīñ ham pe uñgliyāñ

ye bhī nahīñ ke sāhab-e-kirdār ham nahīñ

kahte haiñ rāh-e-ishq meñ baḌhte hue qadam

ab tujh se duur manzil-e-dushvār ham nahīñ

jāneñ musāfirān-e-rah-e-ārzū hameñ

haiñ sañg-e-mīl raah kī dīvār ham nahīñ

pesh-e-jabīn-e-ishq usī kā hai naqsh-e-pā

us ke sivā kisī ke parastār ham nahīñ

mana teri nazar mein tera pyar hum nahin

kaise kahen ki tere talabgar hum nahin

sincha tha jis ko KHun-e-tamanna se raat-din

gulshan mein us bahaar ke haqdar hum nahin

hum ne to apne naqsh-e-qadam bhi miTa diye

lo ab tumhaari rah mein diwar hum nahin

ye bhi nahin ke uThti nahin hum pe ungliyan

ye bhi nahin ke sahab-e-kirdar hum nahin

kahte hain rah-e-ishq mein baDhte hue qadam

ab tujh se dur manzil-e-dushwar hum nahin

jaanen musafiran-e-rah-e-arzu hamein

hain sang-e-mil rah ki diwar hum nahin

pesh-e-jabin-e-ishq usi ka hai naqsh-e-pa

us ke siwa kisi ke parastar hum nahin