mangi mil-jul kar jo rindon ne dua barsat ki

māñgī mil-jul kar jo rindoñ ne duā barsāt kī

jhuum kar aa hī ga.ī kaalī ghaTā barsāt kī

kyuuñ na huuñ kaalī ghaTā.eñ barq-zā barsāt kī

aag paanī meñ lagātī hai havā barsāt kī

apnī ummīdoñ kī khetī hai havā barsāt kī

sāl-bhar tak māñgte haiñ ham duā barsāt kī

rūh-parvar hai bahār-e-jāñ-fazā barsāt kī

kitnī farhat-baḳhsh hai ThanDī havā barsāt kī

sabza-e-ḳhvābīda jaage jī uThī murda zamīñ

kar ga.ī kār-e-masīhā.ī adā barsāt kī

ibtidā jān-e-ḳharīf aur intihā rūh-e-rabī

ibtidā bhī hai vahī jo intihā barsāt kī

allāh allāh gesu-e-mushkīñ-o-shab-gūñ kī bahār

āsmāñ par jis tarah kaalī ghaTā barsāt kī

iltihāb-o-siz-e-dil haiñ bā.is-e-sailāb-e-ashk

hai azal ke din se garmī rahnumā barsāt kī

apne miTne ke tasavvur meñ hai rotā āsmāñ

aur haqīqat kuchh nahīñ us ke sivā barsāt kī

mere ashkoñ kī jhaḌī se paanī paanī ho ga.ī

ban na aa.ī aisī kuchh bigḌī havā barsāt kī

apne dāman meñ liye zīnat urūs-e-nau-bahār

oḌh kar aa.ī hai gulshan meñ ridā barsāt kī

sard-o-garm-e-dahr ne khīñchā vo ḳhatt-e-etidāl

Thiik utrī jism-e-fitrat par qabā barsāt kī

ye ġhazal likkhī to hai 'sho.ala' magar az rū-e-fan

de ga.ī charkā shikast-e-nā-ravā barsāt kī

mangi mil-jul kar jo rindon ne dua barsat ki

jhum kar aa hi gai kali ghaTa barsat ki

kyun na hun kali ghaTaen barq-za barsat ki

aag pani mein lagati hai hawa barsat ki

apni ummidon ki kheti hai hawa barsat ki

sal-bhar tak mangte hain hum dua barsat ki

ruh-parwar hai bahaar-e-jaan-faza barsat ki

kitni farhat-baKHsh hai ThanDi hawa barsat ki

sabza-e-KHwabida jage ji uThi murda zamin

kar gai kar-e-masihai ada barsat ki

ibtida jaan-e-KHarif aur intiha ruh-e-rabi

ibtida bhi hai wahi jo intiha barsat ki

allah allah gesu-e-mushkin-o-shab-gun ki bahaar

aasman par jis tarah kali ghaTa barsat ki

iltihab-o-siz-e-dil hain bais-e-sailab-e-ashk

hai azal ke din se garmi rahnuma barsat ki

apne miTne ke tasawwur mein hai rota aasman

aur haqiqat kuchh nahin us ke siwa barsat ki

mere ashkon ki jhaDi se pani pani ho gai

ban na aai aisi kuchh bigDi hawa barsat ki

apne daman mein liye zinat urus-e-nau-bahaar

oDh kar aai hai gulshan mein rida barsat ki

sard-o-garm-e-dahr ne khincha wo KHatt-e-etidal

Thik utri jism-e-fitrat par qaba barsat ki

ye ghazal likkhi to hai 'shoala' magar az ru-e-fan

de gai charka shikast-e-na-rawa barsat ki