mangne se to hukumat nahin milne wali

māñgne se to hukūmat nahīñ milne vaalī

bhiik meñ ham ko ye azmat nahīñ milne vaalī

gar yahī haal zamāne meñ ta.assub kā rahā

aage nasloñ meñ mohabbat nahīñ milne vaalī

dūsroñ kā bhī adab karnā zarūrī hai bahut

talḳh lahje se to izzat nahīñ milne vaalī

maut kā vaqt muayyan hai azal se is meñ

kisī lamhe kī bhī mohlat nahīñ milne vaalī

vaqt ne baḳhshī haiñ sāñseñ to kamā le nekī

ba.ad marne ke ye daulat nahīñ milne vaalī

zikr-e-ma.abūd hī taskīn kā sāmāñ hogā

zikr duniyā meñ to rāhat nahīñ milne vaalī

vo jo maañ baap kī izzat nahīñ karte 'gauhar'

un se kah do unheñ jannat nahīñ milne vaalī

mangne se to hukumat nahin milne wali

bhik mein hum ko ye azmat nahin milne wali

gar yahi haal zamane mein tassub ka raha

aage naslon mein mohabbat nahin milne wali

dusron ka bhi adab karna zaruri hai bahut

talKH lahje se to izzat nahin milne wali

maut ka waqt muayyan hai azal se is mein

kisi lamhe ki bhi mohlat nahin milne wali

waqt ne baKHshi hain sansen to kama le neki

baad marne ke ye daulat nahin milne wali

zikr-e-mabud hi taskin ka saman hoga

zikr duniya mein to rahat nahin milne wali

wo jo man bap ki izzat nahin karte 'gauhar'

un se kah do unhen jannat nahin milne wali