مانیے بات مری ساز بدلتے رہیے

مانیے بات مری ساز بدلتے رہیے

کبھی لہجہ کبھی آواز بدلتے رہیے

ایک ہی طور جو اپنایا تو پھنس جائیں گے

جیسے حالات ہوں انداز بدلتے رہیے

شکوۂ شومیٔ تقدیر تو نادانی ہے

آپ تدبیر سے پرواز بدلتے رہیے

ہے مناسب یہی اس دنیا میں جینے کے لیے

دم گھٹے جس سے وہ دم ساز بدلتے رہیے

آ گئے آپ صنم خانے میں تو یاد رہے

اپنے سجدوں کے بھی انداز بدلتے رہیے

چاہتے ہیں کہ ہو عزت کا تحفظ ہر دم

دوست بدلے ہیں تو پھر راز بدلتے رہیے

عصر حاضر کا تقاضا تو یہی ہے مونسؔ

راز کی بات ہے ہمراز بدلتے رہیے