manjhi teri kashti ke talabgar bahut hain

māñjhī tirī kashtī ke talabgār bahut haiñ

kuchh log haiñ is paar to us paar bahut haiñ

jis shahr meñ patthar kī dukāñ kholī hai tū ne

us shahr meñ shīshe ke ḳharīdār bahut haiñ

ab tak na banā paa.e koī tāj-mahal aur

kahne ko to is shahr meñ me.amār bahut haiñ

tum shor-e-anal-haq ko dabā hī nahīñ sakte

ye jaan lo mansūr sar-e-dār bahut haiñ

ḳhud apne samajhne kā nahīñ hai koī me.aar

auroñ ko samajhne ke to me.aar bahut haiñ

kuchh soch ke tum shahr kī rāhoñ se guzarnā

do ek jo apne haiñ to aġhyār bahut haiñ

kahne ko to bastī hai ye shorīda-saroñ kī

dīvāne magar chand haiñ hushiyār bahut haiñ

kyā pāoge insāf kī zanjīr hilā kar

is shahr meñ qātil ke taraf-dār bahut haiñ

hālāt sabhī ek havādis bhī sabhī ek

ḳhabreñ bhī sabhī ek haiñ aḳhbār bahut haiñ

maiñ jā ke 'umar' apnī ġhazal kis ko sunā.ūñ

is shahr-e-suḳhan-dāñ meñ to fankār bahut haiñ

manjhi teri kashti ke talabgar bahut hain

kuchh log hain is par to us par bahut hain

jis shahr mein patthar ki dukan kholi hai tu ne

us shahr mein shishe ke KHaridar bahut hain

ab tak na bana pae koi taj-mahal aur

kahne ko to is shahr mein meamar bahut hain

tum shor-e-anal-haq ko daba hi nahin sakte

ye jaan lo mansur sar-e-dar bahut hain

KHud apne samajhne ka nahin hai koi mear

auron ko samajhne ke to mear bahut hain

kuchh soch ke tum shahr ki rahon se guzarna

do ek jo apne hain to aghyar bahut hain

kahne ko to basti hai ye shorida-saron ki

diwane magar chand hain hushiyar bahut hain

kya paoge insaf ki zanjir hila kar

is shahr mein qatil ke taraf-dar bahut hain

haalat sabhi ek hawadis bhi sabhi ek

KHabren bhi sabhi ek hain aKHbar bahut hain

main ja ke 'umar' apni ghazal kis ko sunaun

is shahr-e-suKHan-dan mein to fankar bahut hain