manus ho gae hain gham-e-zindagi se hum

mānūs ho ga.e haiñ ġham-e-zindagī se ham

ham ko ḳhushī mile to na leñge ḳhushī se ham

phūloñ kī aarzū na kareñge kisī se ham

kāñTe sameT laa.e haiñ un kī galī se ham

ham shām-e-ġham ko sub.h-e-masarrat kā naam deñ

sūraj kareñ tulūa na kyuuñ tīrgī se ham

sach ke liye ham aaj ke suqrāt ban ga.e

piite haiñ jaam zahr kā apnī ḳhushī se ham

ham mil ke ḳhud se ḳhud ko bhī pahchānte nahīñ

apne liye bhī ban ga.e haiñ ajnabī se ham

ġham khāte khāte ho gayā mānūs-e-ġham mizāj

ho jaate haiñ fasurda-o-mahvar ḳhushī se ham

ham ko vatan meñ ab koī pahchāntā nahīñ

apne vatan meñ phirte haiñ ab ajnabī se ham

ban jaa.eñ kyuuñ na ḳhud hī numūd-e-sahar kī zau

'āsī' ziyā talab na kareñ tīrgī se ham

manus ho gae hain gham-e-zindagi se hum

hum ko KHushi mile to na lenge KHushi se hum

phulon ki aarzu na karenge kisi se hum

kanTe sameT lae hain un ki gali se hum

hum sham-e-gham ko subh-e-masarrat ka nam den

suraj karen tulua na kyun tirgi se hum

sach ke liye hum aaj ke suqraat ban gae

pite hain jam zahr ka apni KHushi se hum

hum mil ke KHud se KHud ko bhi pahchante nahin

apne liye bhi ban gae hain ajnabi se hum

gham khate khate ho gaya manus-e-gham mizaj

ho jate hain fasurda-o-mahwar KHushi se hum

hum ko watan mein ab koi pahchanta nahin

apne watan mein phirte hain ab ajnabi se hum

ban jaen kyun na KHud hi numud-e-sahar ki zau

'asi' ziya talab na karen tirgi se hum