marka KHatm hua jang abhi jari hai

ma.arka ḳhatm huā jañg abhī jaarī hai

dil kī māneñ ki ḳhirad kī yahī dushvārī hai

koī pattā nahīñ hiltā hai na khultī hai zabāñ

aah phir se kisī tūfān kī tayyārī hai

kyuuñ na ye dekh ke bīnā.ī daġhā de jaa.e

shams par bhī abhī zulmat kā fusūñ taarī hai

ab ye hasrat bhī liye jaate haiñ dil kī dil meñ

ye to kah lete tirā tiir bahut kaarī hai

haa.e kam-zarfī-e-dil tū ne kahīñ kā na rakhā

aah ne kah diyā ta.azīr bahut bhārī hai

tere mashkūr haiñ hamdam kiyā vāzeh tū ne

fe.al-e-ġhārat-garī sayyād kī nā-chārī hai

vaqt-e-furqat ye karam 'soz' pe barpā kar de

hañs ke kah de ki ye in.ām-e-vafādārī hai

marka KHatm hua jang abhi jari hai

dil ki manen ki KHirad ki yahi dushwari hai

koi patta nahin hilta hai na khulti hai zaban

aah phir se kisi tufan ki tayyari hai

kyun na ye dekh ke binai dagha de jae

shams par bhi abhi zulmat ka fusun tari hai

ab ye hasrat bhi liye jate hain dil ki dil mein

ye to kah lete tera tir bahut kari hai

hae kam-zarfi-e-dil tu ne kahin ka na rakha

aah ne kah diya tazir bahut bhaari hai

tere mashkur hain hamdam kiya wazeh tu ne

feal-e-ghaarat-gari sayyaad ki na-chaari hai

waqt-e-furqat ye karam 'soz' pe barpa kar de

hans ke kah de ki ye inam-e-wafadari hai