mawara-e-ram-o-raftar guzarti hui sham

māvarā-e-ram-o-raftār guzartī huī shaam

saañs letī huī siine meñ utartī huī shaam

aur se aur huā jaatā rahā rang-e-shafaq

kyā kisī shāne pe simTī hai bikhartī huī shaam

aañkh ke gird siyāhī sī utar aatī huī

aur kahīñ duur bahut duur Thahartī huī shaam

kyā 'ilāqa hai ki ik jast pe mauqūf huā

kyā ḳhabar jī uThe ik aan meñ martī huī shaam

kyā ḳhabar hai ki mire dil meñ achānak aa jaa.e

aur tham jaa.e ThiThurtī huī Dartī huī shaam

is bahāo meñ bahe jaane se kyā rokegī

ik siyah phuul sā dahlīz pe dhartī huī shaam

ḳhvāb-āsār hue jaane lage haiñ dar-o-bām

kaisī vahshat liye phirtī hai ubhartī huī shaam

mawara-e-ram-o-raftar guzarti hui sham

sans leti hui sine mein utarti hui sham

aur se aur hua jata raha rang-e-shafaq

kya kisi shane pe simTi hai bikharti hui sham

aankh ke gird siyahi si utar aati hui

aur kahin dur bahut dur Thaharti hui sham

kya 'ilaqa hai ki ek jast pe mauquf hua

kya KHabar ji uThe ek aan mein marti hui sham

kya KHabar hai ki mere dil mein achanak aa jae

aur tham jae ThiThurti hui Darti hui sham

is bahao mein bahe jaane se kya rokegi

ek siyah phul sa dahliz pe dharti hui sham

KHwab-asar hue jaane lage hain dar-o-baam

kaisi wahshat liye phirti hai ubharti hui sham