mayus andheron se na a dida-e-tar ho

māyūs añdheroñ se na a dīda-e-tar ho

āḳhir to kabhī is shab-e-ġham kī bhī sahar ho

ab shauq kā iz.hār ba-andāz-e-digar ho

dil TuuT bhī jaa.e to kisī ko na ḳhabar ho

shāyad ki kabhī us ko bhī ho jaa.e mohabbat

shāyad ki kabhī us kī bhī āñkhoñ meñ basar ho

ho dil meñ bapā hashr to ho lab pe ḳhamoshī

yuuñ kījiye ulfat ki unheñ bhī na ḳhabar ho

va.ada to huā hai ki vo ā.eñge sar-e-shām

ab dekhiye kis rang meñ is shab kī sahar ho

kab tak maiñ rahūñ mahv-e-sukūt-e-shab-e-hijrāñ

ai qalb-e-hazīñ naala bapā kar ki sahar ho

ik umr kaTī ḳhāna-badoshī meñ hamārī

hasrat hai ki duniyā meñ koī apnā bhī ghar ho

tum vāris-e-jamshed-o-sikandar sahī lekin

ai kaash tumheñ apne vatan kī bhī ḳhabar ho

sejoñ pe kaTe umr ki kāñToñ pe 'tabassum'

bas ek tamanna hai mohabbat meñ basar ho

mayus andheron se na a dida-e-tar ho

aaKHir to kabhi is shab-e-gham ki bhi sahar ho

ab shauq ka izhaar ba-andaz-e-digar ho

dil TuT bhi jae to kisi ko na KHabar ho

shayad ki kabhi us ko bhi ho jae mohabbat

shayad ki kabhi us ki bhi aankhon mein basar ho

ho dil mein bapa hashr to ho lab pe KHamoshi

yun kijiye ulfat ki unhen bhi na KHabar ho

wada to hua hai ki wo aaenge sar-e-sham

ab dekhiye kis rang mein is shab ki sahar ho

kab tak main rahun mahw-e-sukut-e-shab-e-hijran

ai qalb-e-hazin nala bapa kar ki sahar ho

ek umr kaTi KHana-badoshi mein hamari

hasrat hai ki duniya mein koi apna bhi ghar ho

tum waris-e-jamshed-o-sikandar sahi lekin

ai kash tumhein apne watan ki bhi KHabar ho

sejon pe kaTe umr ki kanTon pe 'tabassum'

bas ek tamanna hai mohabbat mein basar ho