mayus itne ho gae tira-shabi se hum

māyūs itne ho ga.e tīra-shabī se ham

dāman bachā.e phirte haiñ ab raushnī se ham

ai gardish-e-zamāna hameñ dhamkiyāñ na de

har vaqt kaam lete haiñ zinda-dilī se ham

jo haiñ buland hausla kahte nahīñ kabhī

tang aa ga.e haiñ kashmakash-e-zindagī se ham

un kī nigāh-e-lutf hai ġhairoñ pe āj-kal

baiThe hue haiñ bazm meñ ik ajnabī se ham

har ik se māñgne kī to aadat nahīñ hameñ

karte haiñ jab savāl to bas aap hī se ham

dard-e-jigar kuchh aur sivā ho gayā 'nasīr'

baaz aa.e aise logoñ kī chāragarī se ham

mayus itne ho gae tira-shabi se hum

daman bachae phirte hain ab raushni se hum

ai gardish-e-zamana hamein dhamkiyan na de

har waqt kaam lete hain zinda-dili se hum

jo hain buland hausla kahte nahin kabhi

tang aa gae hain kashmakash-e-zindagi se hum

un ki nigah-e-lutf hai ghairon pe aaj-kal

baiThe hue hain bazm mein ek ajnabi se hum

har ek se mangne ki to aadat nahin hamein

karte hain jab sawal to bas aap hi se hum

dard-e-jigar kuchh aur siwa ho gaya 'nasir'

baz aae aise logon ki chaaragari se hum