mayus lauT aai jahan tak nazar gai

māyūs lauT aa.ī jahāñ tak nazar ga.ī

sāhil kī justujū meñ qayāmat guzar ga.ī

bijlī girī chaman pe magar āshiyāñ jalā

aa.ī thī kis kī maut qazā kis ke sar ga.ī

bīmār-e-ġham ke do hī the mushkil-kushā magar

aa.e na tum qazā bhī kahīñ jā ke mar ga.ī

ik ye bhī zindagī hai ki rote haiñ rāt-din

ik vo bhī zindagī thī ki hañste guzar ga.ī

aa.e haiñ jab chaman meñ vo hamrāh ġhair ke

har gul ke saath ġhair pe apnī nazar ga.ī

gul fasl-e-gul meñ yuuñ to 'riyāzī' khile magar

pūchho na us kalī kī jo khil kar bikhar ga.ī

mayus lauT aai jahan tak nazar gai

sahil ki justuju mein qayamat guzar gai

bijli giri chaman pe magar aashiyan jala

aai thi kis ki maut qaza kis ke sar gai

bimar-e-gham ke do hi the mushkil-kusha magar

aae na tum qaza bhi kahin ja ke mar gai

ek ye bhi zindagi hai ki rote hain raat-din

ek wo bhi zindagi thi ki hanste guzar gai

aae hain jab chaman mein wo hamrah ghair ke

har gul ke sath ghair pe apni nazar gai

gul fasl-e-gul mein yun to 'riyazi' khile magar

puchho na us kali ki jo khil kar bikhar gai