مایوس لوٹ آئی جہاں تک نظر گئی

مایوس لوٹ آئی جہاں تک نظر گئی

ساحل کی جستجو میں قیامت گزر گئی

بجلی گری چمن پہ مگر آشیاں جلا

آئی تھی کس کی موت قضا کس کے سر گئی

بیمار غم کے دو ہی تھے مشکل کشا مگر

آئے نہ تم قضا بھی کہیں جا کے مر گئی

اک یہ بھی زندگی ہے کہ روتے ہیں رات دن

اک وہ بھی زندگی تھی کہ ہنستے گزر گئی

آئے ہیں جب چمن میں وہ ہم راہ غیر کے

ہر گل کے ساتھ غیر پہ اپنی نظر گئی

گل فصل گل میں یوں تو ریاضیؔ کھلے مگر

پوچھو نہ اس کلی کی جو کھل کر بکھر گئی