mayus mere gham se na ho chaaragar kahin

māyūs mere ġham se na ho chārāgar kahīñ

ghabrā ke kah na jaa.e ki be-maut mar kahīñ

dil ko bhī ab jalā na de soz-e-jigar kahīñ

barbād ho na jaa.e mirā ye bhī ghar kahīñ

vo aa.ine meñ mahv haiñ maiñ un meñ mahv huuñ

merī nazar kahīñ hai to un kī nazar kahīñ

ai paikar-e-jamīl tujhe yaad ho na ho

tujh se kabhī mile to the ham beshtar kahīñ

kyā marhale haiñ rāh-e-mohabbat ke marhale

dil par kahīñ banī hai mirī jaan par kahīñ

Thahrā ho ek pal bhī jahāñ kārvān-e-dil

aayā na rāh-e-shauq meñ aisā nagar kahīñ

manzil kī justujū meñ ye aalam hai al-amāñ

roke hue haiñ raah kahīñ rāhbar kahīñ

ham ne baḌe ḳhulūs-o-mohabbat se baat kī

jab bhī hameñ milā hai koī mo'atabar kahīñ

shauq-e-safar to hai dil-e-pur-ishtiyāq ko

ho jaa.e muzmahil na ye vaqt-e-safar kahīñ

roz-e-azal vo dard-e-musalsal atā huā

dil ko sukūn mil na sakā umr bhar kahīñ

us ḳhānumāñ-ḳharāb kā aalam na pūchhiye

jis be-navā kī shaam kahīñ ho sahar kahīñ

har zarra pur-ziyā thā tirī jalva-gāh kā

merī hī thī ḳhatā ki jhukāyā na sar kahīñ

ai ham-safar ye azm-e-safar to bajā sahī

dar-pesh ho na zahmat-e-tūl-e-safar kahīñ

rahne de apne haal meñ mast ai sabā na chheḌ

merā abhī ḳhayāl kahīñ hai nazar kahīñ

bahr-e-ḳhudā na chheḌiye yūsuf kā vāqi.a

be-ābrū huā na koī is qadar kahīñ

tasḳhīr-e-kā.enāt ke da.ave bajā sahī

ham-rutba-e-ḳhudā bhī huā hai bashar kahīñ

ho terī baat baat meñ ik baat ai 'kañval'

be-lutf be-maza na ho fikr-o-nazar kahīñ

mayus mere gham se na ho chaaragar kahin

ghabra ke kah na jae ki be-maut mar kahin

dil ko bhi ab jala na de soz-e-jigar kahin

barbaad ho na jae mera ye bhi ghar kahin

wo aaine mein mahw hain main un mein mahw hun

meri nazar kahin hai to un ki nazar kahin

ai paikar-e-jamil tujhe yaad ho na ho

tujh se kabhi mile to the hum beshtar kahin

kya marhale hain rah-e-mohabbat ke marhale

dil par kahin bani hai meri jaan par kahin

Thahra ho ek pal bhi jahan karwan-e-dil

aaya na rah-e-shauq mein aisa nagar kahin

manzil ki justuju mein ye aalam hai al-aman

roke hue hain rah kahin rahbar kahin

hum ne baDe KHulus-o-mohabbat se baat ki

jab bhi hamein mila hai koi mo'atabar kahin

shauq-e-safar to hai dil-e-pur-ishtiyaq ko

ho jae muzmahil na ye waqt-e-safar kahin

roz-e-azal wo dard-e-musalsal ata hua

dil ko sukun mil na saka umr bhar kahin

us KHanuman-KHarab ka aalam na puchhiye

jis be-nawa ki sham kahin ho sahar kahin

har zarra pur-ziya tha teri jalwa-gah ka

meri hi thi KHata ki jhukaya na sar kahin

ai ham-safar ye azm-e-safar to baja sahi

dar-pesh ho na zahmat-e-tul-e-safar kahin

rahne de apne haal mein mast ai saba na chheD

mera abhi KHayal kahin hai nazar kahin

bahr-e-KHuda na chheDiye yusuf ka waqia

be-abru hua na koi is qadar kahin

tasKHir-e-kaenat ke dawe baja sahi

ham-rutba-e-KHuda bhi hua hai bashar kahin

ho teri baat baat mein ek baat ai 'kanwal'

be-lutf be-maza na ho fikr-o-nazar kahin