mayusiyon ki hijr mein ab intiha nahin

māyūsiyoñ kī hijr meñ ab intihā nahīñ

ye ḳhauf hai ki kah na uThe dil ḳhudā nahīñ

ham se suno butoñ se agar āshnā nahīñ

ye nāḳhudā-e-kashtī-e-dil haiñ ḳhudā nahīñ

sunte kisī ġharīb kī kyoñ iltijā nahīñ

sab hai tumhāre qabza-e-qudrat meñ kyā nahīñ

ye be-qarārī dil bhī na ḳhud ban sakā hadaf

haañ haañ tumhāre tiir kī koī ḳhatā nahīñ

apnī zabāñ se ham use bedard kyoñ kaheñ

ye aur baat hai ki vo dard-āshnā nahīñ

ab haath zulm se bhī uThāyā ġhazab kiyā

zālim tire sitam kā bhī ab aasrā nahīñ

ab tak to sote hote maze se lahad meñ ham

afsos hai tumhārī adā meñ qazā nahīñ

kaafī hai arz-e-hāl ko hasrat-bharī nigāh

parde kī baat muñh se kahūñ ye ravā nahīñ

kyā ho gayā shabāb ki jaate haiñ rang-e-tab.a

'safdar' tire kalām meñ ab vo mazā nahīñ

mayusiyon ki hijr mein ab intiha nahin

ye KHauf hai ki kah na uThe dil KHuda nahin

hum se suno buton se agar aashna nahin

ye naKHuda-e-kashti-e-dil hain KHuda nahin

sunte kisi gharib ki kyon iltija nahin

sab hai tumhaare qabza-e-qudrat mein kya nahin

ye be-qarari dil bhi na KHud ban saka hadaf

han han tumhaare tir ki koi KHata nahin

apni zaban se hum use bedard kyon kahen

ye aur baat hai ki wo dard-ashna nahin

ab hath zulm se bhi uThaya ghazab kiya

zalim tere sitam ka bhi ab aasra nahin

ab tak to sote hote maze se lahad mein hum

afsos hai tumhaari ada mein qaza nahin

kafi hai arz-e-haal ko hasrat-bhari nigah

parde ki baat munh se kahun ye rawa nahin

kya ho gaya shabab ki jate hain rang-e-taba

'safdar' tere kalam mein ab wo maza nahin