mazi ko apne bhul na jaen to kya karen

maazī ko apne bhuul na jaa.eñ to kyā kareñ

kab tak ham āsmān ke taare ginā kareñ

yādoñ ke qāfile ko liye saath kyā kareñ

manzil hī jab nahīñ hai to phir kyoñ chalā kareñ

tum ho hamāre saath to duniyā hai saath saath

jab tum nahīñ ho saath to duniyā ko kyā kareñ

rah rah ke de rahā hai dil āvāz-e-bāz-gasht

aadam kī tarah ham bhī na kyoñ ik ḳhatā kareñ

tanhā.ī duur ho ke rahegī isī tarah

chup-chāp jab bhī vaqt mile ham milā kareñ

ailān-e-haq karūñgā zarūr un ke sāmne

ab chāhe mere sar ko vo tan se judā kareñ

mumkin hai is duā se hī bāb-e-asar khule

aao uThā ke haath ko apne duā kareñ

titlī kī tarah phuul se lipTā rahūñgā maiñ

chalne do laakh tez havā.eñ chalā kareñ

kyā lutf-e-mai vo sāmne 'rāhī' agar nahīñ

uThtī haiñ āsmāñ pe ghaTā.eñ uThā kareñ

mazi ko apne bhul na jaen to kya karen

kab tak hum aasman ke tare gina karen

yaadon ke qafile ko liye sath kya karen

manzil hi jab nahin hai to phir kyon chala karen

tum ho hamare sath to duniya hai sath sath

jab tum nahin ho sath to duniya ko kya karen

rah rah ke de raha hai dil aawaz-e-baz-gasht

aadam ki tarah hum bhi na kyon ek KHata karen

tanhai dur ho ke rahegi isi tarah

chup-chap jab bhi waqt mile hum mila karen

ailan-e-haq karunga zarur un ke samne

ab chahe mere sar ko wo tan se juda karen

mumkin hai is dua se hi bab-e-asar khule

aao uTha ke hath ko apne dua karen

titli ki tarah phul se lipTa rahunga main

chalne do lakh tez hawaen chala karen

kya lutf-e-mai wo samne 'rahi' agar nahin

uThti hain aasman pe ghaTaen uTha karen