machal ke bahti nadi ke bahaw ki surat

machal ke bahtī nadī ke bahāv kī sūrat

badal sakī na hamāre subhāv kī sūrat

bañdhe hue haiñ binā Dor ke sabhī rishte

nizām-e-shamsī meñ jaise khiñchāo kī sūrat

is ek dil pe lagī hai ġhamoñ kī aisī bhiiḌ

ki jaise tham gayā lashkar paḌāv kī sūrat

miTāne ke liye tārīkiyāñ zamāna kī

bahut se log jale haiñ alaav kī sūrat

qubūl kartā nahīñ maiñ to aur kyā kartā

thiiñ iltijā meñ bhī un kī dabāv kī sūrat

ab is maqām pe le aa.ī hai mujhe vahshat

jahāñ se phir nahīñ mumkin bachāv kī sūrat

charāġh ilm ke raushan karo tum ab 'bismil'

jahālateñ sadā ristī haiñ ghaav kī sūrat

machal ke bahti nadi ke bahaw ki surat

badal saki na hamare subhaw ki surat

bandhe hue hain bina Dor ke sabhi rishte

nizam-e-shamsi mein jaise khinchao ki surat

is ek dil pe lagi hai ghamon ki aisi bhiD

ki jaise tham gaya lashkar paDaw ki surat

miTane ke liye tarikiyan zamana ki

bahut se log jale hain alaw ki surat

qubul karta nahin main to aur kya karta

thin iltija mein bhi un ki dabaw ki surat

ab is maqam pe le aai hai mujhe wahshat

jahan se phir nahin mumkin bachaw ki surat

charagh ilm ke raushan karo tum ab 'bismil'

jahaalaten sada risti hain ghaw ki surat