machalte rahte hain bistar pe KHwab mere liye

machalte rahte haiñ bistar pe ḳhvāb mere liye

utāre jaate haiñ shab bhar azaab mere liye

maiñ jab safar ke irāde se ghar ko chhoḌtā huuñ

sulagtā rahtā hai ik āftāb mere liye

maiñ terā qarz chukā.ūñgā vasl kī rut meñ

tū apne ashkoñ kā rakhnā hisāb mere liye

rifāqatoñ kī shagufta bashārateñ terī

ta.alluqāt ke saare azaab mere liye

phir us ke baad jo tū chāhe zulm kar duniyā

bas ek harf-e-duā mustajāb mere liye

fuġhāñ kā shor muqaddar hai hijr kī shab meñ

na koī naġhma na chañg o rabāb mere liye

ye kis nigāh kā ezaaz hai koī batlā.e

kiye haiñ kis ne ye ġham intiḳhāb mere liye

'nadīm' rishtoñ kī har aañkh shab-zada hai yahāñ

har ek chehra hai jaise sarāb mere liye

machalte rahte hain bistar pe KHwab mere liye

utare jate hain shab bhar azab mere liye

main jab safar ke irade se ghar ko chhoDta hun

sulagta rahta hai ek aaftab mere liye

main tera qarz chukaunga wasl ki rut mein

tu apne ashkon ka rakhna hisab mere liye

rifaqaton ki shagufta bashaaraten teri

talluqat ke sare azab mere liye

phir us ke baad jo tu chahe zulm kar duniya

bas ek harf-e-dua mustajab mere liye

fughan ka shor muqaddar hai hijr ki shab mein

na koi naghma na chang o rabab mere liye

ye kis nigah ka ezaz hai koi batlae

kiye hain kis ne ye gham intiKHab mere liye

'nadim' rishton ki har aankh shab-zada hai yahan

har ek chehra hai jaise sarab mere liye