machalti hai mere aaghosh mein KHushbu-e-yar ab tak

machaltī hai mire āġhosh meñ ḳhushbu-e-yār ab tak

mirī āñkhoñ meñ hai is sehr-e-rañgīñ kā ḳhumār ab tak

koī aatā nahīñ ab dil kī bastī meñ magar phir bhī

umīdoñ ke charāġhoñ se haiñ raushan rahguzār ab tak

abhī tak nisf shab ko chāñdnī gaatī hai jharnoñ meñ

nahīñ badlī shabāb-e-muntazir kī yādgār ab tak

jalā rakkhe haiñ shahrāhoñ pe ashkoñ ke diye kab se

nahīñ guzrā kabhī is samt se vo shahsavār ab tak

shikast-e-ārzū ko ishq kā anjām kyuuñ samjhūñ

muqābil hai mire ā.īna-e-lail-o-nahār ab tak

machalti hai mere aaghosh mein KHushbu-e-yar ab tak

meri aankhon mein hai is sehr-e-rangin ka KHumar ab tak

koi aata nahin ab dil ki basti mein magar phir bhi

umidon ke charaghon se hain raushan rahguzar ab tak

abhi tak nisf shab ko chandni gati hai jharnon mein

nahin badli shabab-e-muntazir ki yaadgar ab tak

jala rakkhe hain shahrahon pe ashkon ke diye kab se

nahin guzra kabhi is samt se wo shahsawar ab tak

shikast-e-arzu ko ishq ka anjam kyun samjhun

muqabil hai mere aaina-e-lail-o-nahaar ab tak