machalti hai mere sine mein teri aarzu kya kya

machaltī hai mire siine meñ terī aarzū kyā kyā

liye phirtī hai terī chaah mujh ko kū-ba-kū kyā kyā

rahī hai ba.ad-e-murdan bhī tumhārī justujū kyā kyā

ġhubār-e-ḳhāk-e-marqad uḌ rahā hai chār-sū kyā kyā

kabhī āshiq ko samjhāyā kabhī ġhairoñ ko bahlāyā

fareb-āmez haiñ chāleñ tirī o hīla-jū kyā kyā

rihā.ī dī mujhe qaid-e-alā.iq se ināyat kī

kisī kī teġh kā mamnūn hai merā gulū kyā kyā

bahāreñ lūTtā huuñ aap ke tashrīf laane meñ

phalā-phūlā hai merā aaj naḳhl-e-ārzū kyā kyā

tumheñ bhī yaad haiñ kuchh qaul-o-iqrār-o-qasam apne

huī thī darmiyāñ mere tumhāre guftugū kyā kyā

ḳhayāl-e-hijr se hālat taġhayyur hotī jaatī hai

uḌā jaatā hai mere dil se rañg-e-ārzū kyā kyā

tumhāre vāste sun lete haiñ har ek kī bāteñ

hameñ kah jaate haiñ bātoñ hī bātoñ meñ adū kyā kyā

adū kī minnateñ kī haiñ qadam chūme haiñ darbāñ ke

'faroġh' be-sar-o-sāmāñ huā be-ābrū kyā kyā

machalti hai mere sine mein teri aarzu kya kya

liye phirti hai teri chah mujh ko ku-ba-ku kya kya

rahi hai baad-e-murdan bhi tumhaari justuju kya kya

ghubar-e-KHak-e-marqad uD raha hai chaar-su kya kya

kabhi aashiq ko samjhaya kabhi ghairon ko bahlaya

fareb-amez hain chaalen teri o hila-ju kya kya

rihai di mujhe qaid-e-alaiq se inayat ki

kisi ki tegh ka mamnun hai mera gulu kya kya

bahaaren luTta hun aap ke tashrif lane mein

phala-phula hai mera aaj naKHl-e-arzu kya kya

tumhein bhi yaad hain kuchh qaul-o-iqrar-o-qasam apne

hui thi darmiyan mere tumhaare guftugu kya kya

KHayal-e-hijr se haalat taghayyur hoti jati hai

uDa jata hai mere dil se rang-e-arzu kya kya

tumhaare waste sun lete hain har ek ki baaten

hamein kah jate hain baaton hi baaton mein adu kya kya

adu ki minnaten ki hain qadam chume hain darban ke

'farogh' be-sar-o-saman hua be-abru kya kya