madawa-e-junun sair-e-gulistan se nahin hota

madāva-e-junūñ sair-e-gulistāñ se nahīñ hotā

rafū-e-chāk-e-dil tār-e-garebāñ se nahīñ hotā

ba-juz manzil kahīñ rāhat nahīñ miltī musāfir ko

ilāj-e-ābla-pā.ī bayābāñ se nahīñ hotā

hijāb-e-dost ne baḳhshā hai vo lutf-e-yaqīñ dil ko

ki ye āsūda ab husn-e-numāyāñ se nahīñ hotā

jilā hotī hai zarf-e-zīst par tanqīd-e-dānā se

mudāvā nafs kā chashm-e-sanā-ḳhvāñ se nahīñ hotā

ba-qadr-e-zarf fitrat kartī hai bālīdgī dil kī

ye vo kār-e-aham hai jo dabistāñ se nahīñ hotā

kiyā hai rū-shanās-e-afv maiñ ne terī rahmat ko

liyā vo kaam isyāñ se jo īmāñ se nahīñ hotā

jigar ke daaġh hī marqad meñ kaam 'ejāz' ā.eñge

ujālā aisī zulmat meñ charāġhāñ se nahīñ hotā

madawa-e-junun sair-e-gulistan se nahin hota

rafu-e-chaak-e-dil tar-e-gareban se nahin hota

ba-juz manzil kahin rahat nahin milti musafir ko

ilaj-e-abla-pai bayaban se nahin hota

hijab-e-dost ne baKHsha hai wo lutf-e-yaqin dil ko

ki ye aasuda ab husn-e-numayan se nahin hota

jila hoti hai zarf-e-zist par tanqid-e-dana se

mudawa nafs ka chashm-e-sana-KHwan se nahin hota

ba-qadr-e-zarf fitrat karti hai baalidgi dil ki

ye wo kar-e-aham hai jo dabistan se nahin hota

kiya hai ru-shanas-e-afw main ne teri rahmat ko

liya wo kaam isyan se jo iman se nahin hota

jigar ke dagh hi marqad mein kaam 'ejaz' aaenge

ujala aisi zulmat mein charaghan se nahin hota