madad itni to kar ai jazba-e-dard-e-nihan meri

madad itnī to kar ai jazba-e-dard-e-nihāñ merī

tamannā hai vo mere muñh se sun leñ dāstāñ merī

kisī din dekh lenā rang lā.egī fuġhāñ merī

bigāḌegā kahāñ tak baat tū ai āsmāñ merī

ġham-e-duniyā-o-dīñ se kyā ta.alluq maiñ vo mai-kash huuñ

ki hai ḳhāk-e-shifā ḳhāk-e-dar-e-pīr-e-muġhāñ merī

muaaf ai ham-safīrān-e-qafas jurm-e-navā-sanjī

abhī nā-āshnā-e-zabt-e-ulfat hai fuġhāñ merī

vo mahfil hai ki 'sāqib' imtihāñ-gāh-e-mohabbat hai

nigāh-e-fitna-zā un kī hai jān-e-nā-tavāñ merī

madad itni to kar ai jazba-e-dard-e-nihan meri

tamanna hai wo mere munh se sun len dastan meri

kisi din dekh lena rang laegi fughan meri

bigaDega kahan tak baat tu ai aasman meri

gham-e-duniya-o-din se kya talluq main wo mai-kash hun

ki hai KHak-e-shifa KHak-e-dar-e-pir-e-mughan meri

muaf ai ham-safiran-e-qafas jurm-e-nawa-sanji

abhi na-ashna-e-zabt-e-ulfat hai fughan meri

wo mahfil hai ki 'saqib' imtihan-gah-e-mohabbat hai

nigah-e-fitna-za un ki hai jaan-e-na-tawan meri