madd-e-nazar nahin hai faqat mehrban ki KHair

madd-e-nazar nahīñ hai faqat mehrbāñ kī ḳhair

shāmil mirī duā meñ dil-e-dushmanāñ kī ḳhair

fursat mile to apnī zamīñ kī ḳhabar bhī le

ai rabb-e-zul-jalāl tire āsmāñ kī ḳhair

josh-e-junūñ meñ pesh-e-nazar maslahat bhī thī

sajde kiye haiñ maañg ke us āstāñ kī ḳhair

har ins-o-jāñ ne aañkh kaḌe vaqt pher lī

ham the ki māñgte rahe har ins-o-jāñ kī ḳhair

yaḳh-bār sard-mehrī-e-insāñ se kā.enāt

is arz-e-zamharīr meñ qalb-e-tapāñ kī ḳhair

insāñ kā haath un kī taraf bhī darāz hai

pākīzgī-e-husn-e-mah-o-kahkashāñ kī ḳhair

TuuTā hai dil jarāhat-e-chāra-garāñ kā shukr

TuuTā hai jaam niyyat-e-shīsha-garāñ kī ḳhair

ye shāḳh-e-sar-barahna ye jhakkaḌ ye raqs-e-barq

'manzūr' ḳhair ḳhair tire āshiyāñ kī ḳhair

madd-e-nazar nahin hai faqat mehrban ki KHair

shamil meri dua mein dil-e-dushmanan ki KHair

fursat mile to apni zamin ki KHabar bhi le

ai rabb-e-zul-jalal tere aasman ki KHair

josh-e-junun mein pesh-e-nazar maslahat bhi thi

sajde kiye hain mang ke us aastan ki KHair

har ins-o-jaan ne aankh kaDe waqt pher li

hum the ki mangte rahe har ins-o-jaan ki KHair

yaKH-bar sard-mehri-e-insan se kaenat

is arz-e-zamharir mein qalb-e-tapan ki KHair

insan ka hath un ki taraf bhi daraaz hai

pakizgi-e-husn-e-mah-o-kahkashan ki KHair

TuTa hai dil jarahat-e-chaara-garan ka shukr

TuTa hai jam niyyat-e-shisha-garan ki KHair

ye shaKH-e-sar-barahna ye jhakkaD ye raqs-e-barq

'manzur' KHair KHair tere aashiyan ki KHair