maghrur the apni zat par hum

maġhrūr the apnī zaat par ham

rone lage baat baat par ham

ai dil tirī maut kā bhī ġham hai

ḳhush bhī haiñ tirī najāt par ham

luT jā.eñge zabt-e-ġham ke hāthoñ

mar jā.eñge apnī baat par ham

ye bhī tire ġham kā aasrā hai

hañste haiñ ġham-e-hayāt par ham

kyā naaz thā 'saif' hausle par

chup ho ga.e ek baat par ham

maghrur the apni zat par hum

rone lage baat baat par hum

ai dil teri maut ka bhi gham hai

KHush bhi hain teri najat par hum

luT jaenge zabt-e-gham ke hathon

mar jaenge apni baat par hum

ye bhi tere gham ka aasra hai

hanste hain gham-e-hayat par hum

kya naz tha 'saif' hausle par

chup ho gae ek baat par hum