mah-e-visal tujhe to KHabar nahin hogi

mah-e-visāl tujhe to ḳhabar nahīñ hogī

ki dil meñ terī jagah tīrgī makīñ hogī

vo maiñ nahīñ to koī aur bhī nahīñ hogā

ki jis ke dard kī āvāz naġhmagīñ hogī

bas is talāsh meñ chhānā hai halqa-e-hūrāñ

koī to hogī jo us kī tarah hasīñ hogī

diloñ kī saltanateñ fat.h kar sakegī vo

ki jis zabān meñ tāsīr-e-angbīñ hogī

palaT ke shahr meñ aayā to dam hī ghuTne lagā

tavaqqo thī ki mirī jaañ yahīñ kahīñ hogī

mirī zabāñ pe na aa.egī dāstān tirī

ye merī aañkh tire dard kī amiiñ hogī

yahī raqīb se mil kar lagā mujhe 'adnān'

vo mere saath rahegī agar zahīñ hogī

mah-e-visal tujhe to KHabar nahin hogi

ki dil mein teri jagah tirgi makin hogi

wo main nahin to koi aur bhi nahin hoga

ki jis ke dard ki aawaz naghmagin hogi

bas is talash mein chhana hai halqa-e-huran

koi to hogi jo us ki tarah hasin hogi

dilon ki saltanaten fath kar sakegi wo

ki jis zaban mein tasir-e-angbin hogi

palaT ke shahr mein aaya to dam hi ghuTne laga

tawaqqo thi ki meri jaan yahin kahin hogi

meri zaban pe na aaegi dastan teri

ye meri aankh tere dard ki amin hogi

yahi raqib se mil kar laga mujhe 'adnan'

wo mere sath rahegi agar zahin hogi