mah-jabinon ki adaon se ulajh baiTha hun

mah-jabīnoñ kī adāoñ se ulajh baiThā huuñ

is kā matlab hai balāoñ se ulajh baiThā huuñ

bāb-e-tāsīr se nākām palaT aa.ī hai

is liye apnī duāoñ se ulajh baiThā huuñ

terī dahlīz pe jhukne kā savāl aayā thā

maiñ zamāne kī anāoñ se ulajh baiThā huuñ

jo musāfir ke liye ba.is-e-taskīn nahīñ

aise ashjār kī chhāñv se ulajh baiThā huuñ

jo ġharīboñ kā diyā phūñk ke tham jaatī hai

aisī kam-zarf havāoñ se ulajh baiThā huuñ

ab tirī god ke pāloñ meñ bhī ehsās nahīñ

bas yahī soch ke gaañv se ulajh baiThā huuñ

arsh vaale mirī tauqīr salāmat rakhnā

farsh ke saare ḳhudāoñ se ulajh baiThā huuñ

apne qātil se ulajhne kā irāda kar ke

log kahte haiñ ḳhalāoñ se ulajh baiThā huuñ

ek kam-zarf kī be-rabt jafā kī ḳhātir

shahr-vāloñ kī vafāoñ se ulajh baiThā huuñ

terī dastār se 'kāzim' maiñ ulajh na paatā

bas yahī soch ke paañv se ulajh baiThā huuñ

mah-jabinon ki adaon se ulajh baiTha hun

is ka matlab hai balaon se ulajh baiTha hun

bab-e-tasir se nakaam palaT aai hai

is liye apni duaon se ulajh baiTha hun

teri dahliz pe jhukne ka sawal aaya tha

main zamane ki anaon se ulajh baiTha hun

jo musafir ke liye bais-e-taskin nahin

aise ashjar ki chhanw se ulajh baiTha hun

jo gharibon ka diya phunk ke tham jati hai

aisi kam-zarf hawaon se ulajh baiTha hun

ab teri god ke palon mein bhi ehsas nahin

bas yahi soch ke ganw se ulajh baiTha hun

arsh wale meri tauqir salamat rakhna

farsh ke sare KHudaon se ulajh baiTha hun

apne qatil se ulajhne ka irada kar ke

log kahte hain KHalaon se ulajh baiTha hun

ek kam-zarf ki be-rabt jafa ki KHatir

shahr-walon ki wafaon se ulajh baiTha hun

teri dastar se 'kazim' main ulajh na pata

bas yahi soch ke panw se ulajh baiTha hun