mahaz-e-ilm pe chhaya hua andhera hai

mahāz-e-ilm pe chhāyā huā añdherā hai

ḳhirad kī raah ko dīvāngī ne gherā hai

chaman kī ḳhaak meñ ibrat kī dāstāneñ haiñ

sisak rahī haiñ bahāreñ ḳhizāñ kā Derā hai

charāġh-e-dair-o-haram jal ga.e magar ab bhī

jidhar nigāh uThāo udhar añdherā hai

samundaroñ pe sitāroñ pe nazm-e-ālam par

na iḳhtiyār tumhārā hai aur na merā hai

hazār rañg bharī zindagī pe naaz na kar

qadam sambhal ke uThā maut kā añdherā hai

ye aate jaate hue ajnabī na samjheñge

gadā-nasīb batā de kidhar kā pherā hai

ye kachchī niiñd kī āñkheñ ye surmagīñ tevar

añdherī raat ke dāman meñ bhī saverā hai

qadam qadam pe vafā ke diye jalā ke chalo

sunā hai 'fazl' adam meñ bahut añdherā hai

mahaz-e-ilm pe chhaya hua andhera hai

KHirad ki rah ko diwangi ne ghera hai

chaman ki KHak mein ibrat ki dastanen hain

sisak rahi hain bahaaren KHizan ka Dera hai

charagh-e-dair-o-haram jal gae magar ab bhi

jidhar nigah uThao udhar andhera hai

samundaron pe sitaron pe nazm-e-alam par

na iKHtiyar tumhaara hai aur na mera hai

hazar rang bhari zindagi pe naz na kar

qadam sambhal ke uTha maut ka andhera hai

ye aate jate hue ajnabi na samjhenge

gada-nasib bata de kidhar ka phera hai

ye kachchi nind ki aankhen ye surmagin tewar

andheri raat ke daman mein bhi sawera hai

qadam qadam pe wafa ke diye jala ke chalo

suna hai 'fazl' adam mein bahut andhera hai