mahbub-e-nazar aap ke chehre ki ziya hai

mahbūb-e-nazar aap ke chehre kī ziyā hai

matlūb-e-jabīñ aap kā naqsh-e-kaf-e-pā hai

ham ne tire jalve kā jise aks kahā hai

logoñ ne use phuul kā unvān diyā hai

hañste hue tāroñ kā galā ghoñT diyā hai

sūraj kī shuāoñ ne baḌā zulm kiyā hai

martā hai to mar jaa.e koī merī balā se

mujh ko mire māhaul ne ye dars diyā hai

āñkhoñ meñ haiñ aañsū ki añdherā hai pur-afshāñ

jis chehre ko dekhā vahī dhuñdlā sā lagā hai

mahbub-e-nazar aap ke chehre ki ziya hai

matlub-e-jabin aap ka naqsh-e-kaf-e-pa hai

hum ne tere jalwe ka jise aks kaha hai

logon ne use phul ka unwan diya hai

hanste hue taron ka gala ghonT diya hai

suraj ki shuaon ne baDa zulm kiya hai

marta hai to mar jae koi meri bala se

mujh ko mere mahaul ne ye dars diya hai

aankhon mein hain aansu ki andhera hai pur-afshan

jis chehre ko dekha wahi dhundla sa laga hai