mahdud kar nazar ko na tanha bahaar dekh

mahdūd kar nazar ko na tanhā bahār dekh

gulshan ke saath saath dil-e-dāġh-dār dekh

himmat na haar gardish-e-lail-o-nahār dekh

kuchh aur din abhī sitam-e-rozgār dekh

tuutī kī tarah dekh na misl-e-hazār dekh

insān ban ke naqsh-o-nigār-e-bahār dekh

ai nā-shanās himmat-e-insāñ zarā samajh

dil kī bisāt dekh ġham-e-rozgār dekh

mansūr kī zabāñ se tū rāz-e-ḳhudī sunā

merī jabīñ meñ jalva-e-husn-e-nigār dekh

barbād kar na zindagī-e-musta.ār ko

milnī nahīñ ye chiiz tujhe bār-bār dekh

ai shahsavār-e-arsa-e-husn ek aur vaar

haiñ aur bhī kalīm sar-e-rahguzār dekh

ai ham-nashīñ kudūrat-e-jānāñ nahīñ ga.ī

ye hai javāb-nāma-e-baḳht-e-ġhubār dekh

vo mai-kada khulā vo mirā mudda.ā milā

vo aa rahā hai jhuum ke abr-e-bahār dekh

maiñ to rahīn-e-lazzat-e-āzār ho chukā

ab koī aur ai sitam-e-rozgār dekh

dil meñ mire judā.ī-e-gulshan ke daaġh haiñ

laayā huuñ apne saath qafas meñ bahār dekh

kaisī bahār-e-ḳhuld kahāñ kā jamāl-e-hūr

rang-e-bayān vā.iz-e-parhez-gār dekh

maiñ jāntā huuñ kis kī haiñ jalva-numā.iyāñ

merī nazar se shaiḳh jahān-e-bahār dekh

ātish-kada tamām gulistāñ banā diyā

fasl-e-bahār-rang navā-e-hazār dekh

dāman meñ bāda-ḳhvār ke vaa.iz panāh le

mahshar meñ saiñkaḌoñ haiñ kahīñ jā ke yaar dekh

kyā ham bhī haiñ kalīm ki ġhash khā ke gir paḌeñ

haañ dekh to hameñ nigah-e-sho.ala-bār dekh

rahmat nisār hotī hai sadqe hai maġhfirat

qismat to apnī ai nigah-e-sharmsār dekh

kausar kā mai-kada hai to jannat kā gul-kada

husn-e-mazāq 'shāġhil'-e-parhez-gār dekh

mahdud kar nazar ko na tanha bahaar dekh

gulshan ke sath sath dil-e-dagh-dar dekh

himmat na haar gardish-e-lail-o-nahaar dekh

kuchh aur din abhi sitam-e-rozgar dekh

tuti ki tarah dekh na misl-e-hazar dekh

insan ban ke naqsh-o-nigar-e-bahaar dekh

ai na-shanas himmat-e-insan zara samajh

dil ki bisat dekh gham-e-rozgar dekh

mansur ki zaban se tu raaz-e-KHudi suna

meri jabin mein jalwa-e-husn-e-nigar dekh

barbaad kar na zindagi-e-mustaar ko

milni nahin ye chiz tujhe bar-bar dekh

ai shahsawar-e-arsa-e-husn ek aur war

hain aur bhi kalim sar-e-rahguzar dekh

ai ham-nashin kudurat-e-jaanan nahin gai

ye hai jawab-nama-e-baKHt-e-ghubar dekh

wo mai-kada khula wo mera muddaa mila

wo aa raha hai jhum ke abr-e-bahaar dekh

main to rahin-e-lazzat-e-azar ho chuka

ab koi aur ai sitam-e-rozgar dekh

dil mein mere judai-e-gulshan ke dagh hain

laya hun apne sath qafas mein bahaar dekh

kaisi bahaar-e-KHuld kahan ka jamal-e-hur

rang-e-bayan waiz-e-parhez-gar dekh

main jaanta hun kis ki hain jalwa-numaiyan

meri nazar se shaiKH jahan-e-bahaar dekh

aatish-kada tamam gulistan bana diya

fasl-e-bahaar-rang nawa-e-hazar dekh

daman mein baada-KHwar ke waiz panah le

mahshar mein sainkaDon hain kahin ja ke yar dekh

kya hum bhi hain kalim ki ghash kha ke gir paDen

han dekh to hamein nigah-e-shoala-bar dekh

rahmat nisar hoti hai sadqe hai maghfirat

qismat to apni ai nigah-e-sharmsar dekh

kausar ka mai-kada hai to jannat ka gul-kada

husn-e-mazaq 'shaghil'-e-parhez-gar dekh