mahfil-e-dost mein go sina-figar aae hain

mahfil-e-dost meñ go sīna-figār aa.e haiñ

sūrat-e-naġhma ba-andāza-e-bahār aa.e haiñ

is nazar se ki tire zulm kī tash.hīr na ho

be-qarārī meñ liye dil kā qarār aa.e haiñ

ek pindār-e-ḳhudī jis ko bachā rakkhā thā

aaj ham vo bhī tirī bazm meñ haar aa.e haiñ

zulmat-e-shām-e-ḳhizāñ yaad karegī barsoñ

ham jab aa.e haiñ gulistāñ-ba-kanār aa.e haiñ

ai rafīqān-e-rah-e-shauq kahāñ ho bolo

ham tumheñ shahr-o-bayābāñ meñ pukār aa.e haiñ

hai pur-āshob fazā phir bhī kisī jānib se

dil ke vīrāne meñ paiġhām-e-bahār aa.e haiñ

ġham-e-manzil meñ bhaTakte hī guzar jaatī hai

chhoḌ kar jab se terī rāh-e-guzar aa.e haiñ

zindagī roz na.ī lagtī hai dil vāloñ ko

garche har roz vahī lail-o-nahār aa.e haiñ

dekhnā luuTī ga.ī kaun sī bastī yaaro

uḌ ke dil tak jo kudūrat ke ġhubār aa.e haiñ

apne anjām se ḳhush apnī vafā par nāzāñ

muskurāte hue ham jānib-e-dār aa.e haiñ

mahfil-e-dost mein go sina-figar aae hain

surat-e-naghma ba-andaza-e-bahaar aae hain

is nazar se ki tere zulm ki tashhir na ho

be-qarari mein liye dil ka qarar aae hain

ek pindar-e-KHudi jis ko bacha rakkha tha

aaj hum wo bhi teri bazm mein haar aae hain

zulmat-e-sham-e-KHizan yaad karegi barson

hum jab aae hain gulistan-ba-kanar aae hain

ai rafiqan-e-rah-e-shauq kahan ho bolo

hum tumhein shahr-o-bayaban mein pukar aae hain

hai pur-ashob faza phir bhi kisi jaanib se

dil ke virane mein paigham-e-bahaar aae hain

gham-e-manzil mein bhaTakte hi guzar jati hai

chhoD kar jab se teri rah-e-guzar aae hain

zindagi roz nai lagti hai dil walon ko

garche har roz wahi lail-o-nahaar aae hain

dekhna luTi gai kaun si basti yaro

uD ke dil tak jo kudurat ke ghubar aae hain

apne anjam se KHush apni wafa par nazan

muskuraate hue hum jaanib-e-dar aae hain