محفل زیست بھی سجی ہے ابھی

محفل زیست بھی سجی ہے ابھی

حیثیت دل کی مرکزی ہے ابھی

اک تمنا بجھی بجھی ہے ابھی

ایک خواہش دبی دبی ہے ابھی

اور تھوڑے مزاج مل جائیں

یہ ملاقات سرسری ہے ابھی

تیرے چہرے پہ مصلحت روشن

تیرا لہجہ بھی مخملی ہے ابھی

جھوٹ کا پھٹ پڑے گا غبارہ

اس میں کافی ہوا بھری ہے ابھی

وہ جو مجبوریوں سے گوندھی گئی

وہ ہنسی میز پر رکھی ہے ابھی

کچھ تو اندازہ ہو گیا قائم

تجزیہ گرچہ سرسری ہے ابھی

دوڑتا ہے رگوں میں خون عاقبؔ

اور رواں سانسوں کی ندی ہے ابھی