mahfil ishq mein jo yar uThe aur baiThe

mahfil ishq meñ jo yaar uThe aur baiThe

hai vo malka ki subuk-bār uThe aur baiThe

raqs meñ jab ki vo tarrār uThe aur baiThe

be-qarārī se ye bīmār uThe aur baiThe

kasrat-e-ḳhalq vo mahfil meñ hai terī ik shaḳhs

nahīñ mumkin hai ki yakbār uThe aur baiThe

sar uThāne kī bhī fursat nahīñ detā hai hameñ

chū habāb-e-sar-e-jū yaar uThe aur baiThe

ḳhauf-e-badnāmī se tujh paas na aa.e varna

ham ka.ī baar sun ai yaar uThe aur baiThe

dard kyuuñ baiThe biThā.e tire sar meñ uTThā

ki qalaq se tire sau baar uThe aur baiThe

terī dīvār to kyā gumbad-e-dvvār bhī yaar

chāhiye āh-e-sharar-bār uThe aur baiThe

aap kī majlis-e-ālī meñ alarraġhm raqīb

ba-ijāzat ye gunahgār uThe aur baiThe

aap se ab to is ahqar ko sarokār nahīñ

jis jagah chāhiye sarkār uThe aur baiThe

hazrat-e-dil sipar-e-dāġh-e-junūñ ko le kar

yuuñ bar-e-ishq jigar-ḳhvār uThe aur baiThe

chuuñ dilerāna koī muñh pe sipar ko le kar

sher-e-ḳhūñ-ḳhvār ko lalkār uThe aur baiThe

kafashdoz un ke jab apne hī barābar baiTheñ

aisī majlis meñ to paizār uThe aur baiThe

zāhid aayā to gavārā nahīñ rindoñ ham ko

apnī is bazm meñ makkār uThe aur baiThe

donoñ kānoñ ko pakaḌ kar yahī hai us kī sazā

kah do sau baar ye ayyār uThe aur baiThe

baiThte uThte isī tarah ke likh aur ġhazal

jis meñ 'ehsāñ' ho na paikār uThe aur baiThe

mahfil ishq mein jo yar uThe aur baiThe

hai wo malka ki subuk-bar uThe aur baiThe

raqs mein jab ki wo tarrar uThe aur baiThe

be-qarari se ye bimar uThe aur baiThe

kasrat-e-KHalq wo mahfil mein hai teri ek shaKHs

nahin mumkin hai ki yakbar uThe aur baiThe

sar uThane ki bhi fursat nahin deta hai hamein

chu habab-e-sar-e-ju yar uThe aur baiThe

KHauf-e-badnami se tujh pas na aae warna

hum kai bar sun ai yar uThe aur baiThe

dard kyun baiThe biThae tere sar mein uTTha

ki qalaq se tere sau bar uThe aur baiThe

teri diwar to kya gumbad-e-dwwar bhi yar

chahiye aah-e-sharar-bar uThe aur baiThe

aap ki majlis-e-ali mein alarraghm raqib

ba-ijazat ye gunahgar uThe aur baiThe

aap se ab to is ahqar ko sarokar nahin

jis jagah chahiye sarkar uThe aur baiThe

hazrat-e-dil sipar-e-dagh-e-junun ko le kar

yun bar-e-ishq jigar-KHwar uThe aur baiThe

chun dilerana koi munh pe sipar ko le kar

sher-e-KHun-KHwar ko lalkar uThe aur baiThe

kafashdoz un ke jab apne hi barabar baiThen

aisi majlis mein to paizar uThe aur baiThe

zahid aaya to gawara nahin rindon hum ko

apni is bazm mein makkar uThe aur baiThe

donon kanon ko pakaD kar yahi hai us ki saza

kah do sau bar ye ayyar uThe aur baiThe

baiThte uThte isi tarah ke likh aur ghazal

jis mein 'ehsan' ho na paikar uThe aur baiThe