محفل کا بتوں کی کیا کہنا ہم دل کو جہاں گم کر بیٹھے

محفل کا بتوں کی کیا کہنا ہم دل کو جہاں گم کر بیٹھے

خود اپنی پریشانی سے وہاں سامان تبسم کر بیٹھے

غرقاب تو ہونا تھا آخر طوفان نہ جانے کب آتا

خود اپنا سفینہ لے جا کر ہم نذر تلاطم کر بیٹھے

یہ اہل ستم کی دنیا ہے افسانۂ غم ہے بے معنی

انجام نہ سوچا کچھ دل میں آغاز کہاں تم کر بیٹھے

اس نظم گلستاں پر ہم کو آتی ہے ہنسی بھی رونا بھی

پھولوں کی دو روزہ زینت پر کانٹے بھی تبسم کر بیٹھے

جب مرنا ہے تو مرنا ہے زندہ رہ کر کیا کرنا ہے

ہم کو جو فنا کی یاد آئی جینے سے تصادم کر بیٹھے

وہ سوز کہاں وہ ساز کہاں دل اہل طرب کا ٹوٹ گیا

محفل میں روٹھ کے بیٹھے کیا تم ختم ترنم کر بیٹھے

ہے سنگ دلوں کی محفل میں اظہار درد دل کیسا

یہ بات کہاں کی تھی خوشترؔ اور آ کے کہاں تم کر بیٹھے