mahfil mein jaane kaise sar-e-am aa gaya

mahfil meñ jaane kaise sar-e-ām aa gayā

āḳhir zabāñ pe us ke mirā naam aa gayā

maiñ ne chhupā ke rakkhā thā jo dil meñ rāz-e-ishq

ḳhat meñ qubūl likh ke vo paiġhām aa gayā

kaise kahūñ falak maiñ tujhe kitnā ḳhush huuñ aaj

ye dekh le duāoñ kā in.aam aa gayā

saaqī se āñkhoñ āñkhoñ meñ ḳhālī ishāratan

kahne kī der thī ki bharā jaam aa gayā

qātil kā parda faash kiyā jabki maiñ ne ḳhud

mujh par hī haif qatl kā ilzām aa gayā

ab kuchh na hogā jaag ke ġhaflat kī niiñd se

sūraj ġhurūb hone lab-e-bām aa gayā

sayyād ke baġhair 'm'āle' na rah sakā

ghar lauT kar parinda sar-e-shām aa gayā

mahfil mein jaane kaise sar-e-am aa gaya

aaKHir zaban pe us ke mera nam aa gaya

main ne chhupa ke rakkha tha jo dil mein raaz-e-ishq

KHat mein qubul likh ke wo paigham aa gaya

kaise kahun falak main tujhe kitna KHush hun aaj

ye dekh le duaon ka inam aa gaya

saqi se aankhon aankhon mein KHali ishaaratan

kahne ki der thi ki bhara jam aa gaya

qatil ka parda fash kiya jabki main ne KHud

mujh par hi haif qatl ka ilzam aa gaya

ab kuchh na hoga jag ke ghaflat ki nind se

suraj ghurub hone lab-e-baam aa gaya

sayyaad ke baghair 'm'ale' na rah saka

ghar lauT kar parinda sar-e-sham aa gaya