mahfil mein kisi ki humne unhen ek bar zara dekha hi to hai

mahfil meñ kisī kī ham ne unheñ ik baar zarā dekhā hī to hai

yuuñ naam pe un ke dhaḌke hai dil goyā un se rishta hī to hai

yādoñ ke suhāne mausam meñ us garm-badan kī aañch liye

chal nikle haiñ ham yuuñ ḳhush ḳhush hai jaise vo idhar rahtā hī to hai

ham kuchh bhī kaheñ lekin un se jo ek ta.alluq thā na rahā

rishte kī haqīqat kyā ma.anī bas TuuT gayā dhāgā hī to hai

kyā kyā na ajab lamhe guzre tanhā.ī-e-shab meñ is dil par

ḳhush-fahmī ki sab kah Dālūñgā jaise vo mirī suntā hī to hai

be-samt chale to haiñ lekin ham jānte haiñ anjām-e-safar

bekār hai jī ko kalpānā do-chār ghaḌī chalnā hī to hai

aap apne se bāhar aa kar bhī sab dekh liyā sab jaan liyā

aalam hai ye saarā bhed bharā parde se pare pardā hī to hai

tanhā.ī meñ shām-e-furqat kī ye soch ke ḳhush hai jī apnā

aa.egā manā leñge us ko jaise vo idhar aatā hī to hai

har sinf-e-suḳhan ko 'pāshī'-jī ik tarz na.ī dī hai ham ne

har ik se alag har ik se judā har sher meñ aks apnā hī to hai

mahfil mein kisi ki hum ne unhen ek bar zara dekha hi to hai

yun nam pe un ke dhaDke hai dil goya un se rishta hi to hai

yaadon ke suhane mausam mein us garm-badan ki aanch liye

chal nikle hain hum yun KHush KHush hai jaise wo idhar rahta hi to hai

hum kuchh bhi kahen lekin un se jo ek talluq tha na raha

rishte ki haqiqat kya mani bas TuT gaya dhaga hi to hai

kya kya na ajab lamhe guzre tanhai-e-shab mein is dil par

KHush-fahmi ki sab kah Dalunga jaise wo meri sunta hi to hai

be-samt chale to hain lekin hum jaante hain anjam-e-safar

bekar hai ji ko kalpana do-chaar ghaDi chalna hi to hai

aap apne se bahar aa kar bhi sab dekh liya sab jaan liya

aalam hai ye sara bhed bhara parde se pare parda hi to hai

tanhai mein sham-e-furqat ki ye soch ke KHush hai ji apna

aaega mana lenge us ko jaise wo idhar aata hi to hai

har sinf-e-suKHan ko 'pashi'-ji ek tarz nai di hai hum ne

har ek se alag har ek se juda har sher mein aks apna hi to hai