mahfil mein sab ko apna parastar kar diya

mahfil meñ sab ko apnā parastār kar diyā

shīrīñ-zabāñ se us ne chamatkār kar diyā

ham jaisoñ meñ kahāñ thī bhalā ye salāhiyat

sohbat ne shā'iroñ kī suḳhan-kār kar diyā

ḳhabroñ meñ sach kī pahle sī ḳhushbū nahīñ rahī

so band ham ne aaj se aḳhbār kar diyā

rakhte haiñ ab har ek qadam dekh-bhāl kar

itnā to Thokaroñ ne samajh-dār kar diyā

qaa.em rahe hamārī kitāboñ se dostī

is ne ġharīb-e-fikr ko zardār kar diyā

aatī hai sharm aaj batāte hue 'vivek'

logoñ ne rājnītī ko byopār kar diyā

mahfil mein sab ko apna parastar kar diya

shirin-zaban se us ne chamatkar kar diya

hum jaison mein kahan thi bhala ye salahiyat

sohbat ne sha'iron ki suKHan-kar kar diya

KHabron mein sach ki pahle si KHushbu nahin rahi

so band hum ne aaj se aKHbar kar diya

rakhte hain ab har ek qadam dekh-bhaal kar

itna to Thokaron ne samajh-dar kar diya

qaem rahe hamari kitabon se dosti

is ne gharib-e-fikr ko zardar kar diya

aati hai sharm aaj batate hue 'wiwek'

logon ne rajniti ko byopar kar diya