mahki hai moattar hai faza uske labon se

mahkī hai mo.attar hai fazā us ke laboñ se

husn-e-suḳhan aur nām-e-ḳhudā us ke laboñ se

ab vāhima-e-ishq ho yā vāhima-e-husn

suntā to huuñ kuchh zikr-e-vafā us ke laboñ se

ye naġhmagarī hīla-e-dīvāna-garī hai

aatī hai bas ab hū kī sadā us ke laboñ se

har baat shagufta hī likhī us ke laboñ kī

har aan shagūfa sā khilā us ke laboñ se

hogā kahīñ sapne meñ chhupā harf-e-vafā bhī

aatī to hai ḳhushbu-e-vafā us ke laboñ se

go rabt to kitnā hai magar us pe bhī kyā zikr

sun le jo koī naam mirā us ke laboñ se

dushnām bhī paa.e hue ḳhush-kām bhī 'haqqī'

ham ne bahut in.aam liyā us ke laboñ se

mahki hai moattar hai faza us ke labon se

husn-e-suKHan aur nam-e-KHuda us ke labon se

ab wahima-e-ishq ho ya wahima-e-husn

sunta to hun kuchh zikr-e-wafa us ke labon se

ye naghmagari hila-e-diwana-gari hai

aati hai bas ab hu ki sada us ke labon se

har baat shagufta hi likhi us ke labon ki

har aan shagufa sa khila us ke labon se

hoga kahin sapne mein chhupa harf-e-wafa bhi

aati to hai KHushbu-e-wafa us ke labon se

go rabt to kitna hai magar us pe bhi kya zikr

sun le jo koi nam mera us ke labon se

dushnam bhi pae hue KHush-kaam bhi 'haqqi'

hum ne bahut inam liya us ke labon se