mahrum-e-KHwab dida-e-hairan na tha kabhi

mahrūm-e-ḳhvāb dīda-e-hairāñ na thā kabhī

terā ye rañg ai shab-e-hijrāñ na thā kabhī

thā lutf-e-vasl aur kabhī afsūn-e-intizār

yuuñ dard-e-hijr silsila-jumbāñ na thā kabhī

pursāñ na thā koī to ye rusvā.iyāñ na thiiñ

zāhir kisī pe hāl-e-pareshāñ na thā kabhī

har-chand ġham bhī thā magar ehsās-e-ġham na thā

darmāñ na thā to mātam-e-darmāñ na thā kabhī

din bhī udaas aur mirī raat bhī udaas

aisā to vaqt ai ġham-e-daurāñ na thā kabhī

daur-e-ḳhizāñ meñ yuuñ mire dil ko qarār hai

maiñ jaise āshnā-e-bahārāñ na thā kabhī

kyā din the jab nazar meñ ḳhizāñ bhī bahār thī

yuuñ apnā ghar bahār meñ vīrāñ na thā kabhī

be-kaif be-nashāt na thī is qadar hayāt

jiinā agarche ishq meñ āsāñ na thā kabhī

mahrum-e-KHwab dida-e-hairan na tha kabhi

tera ye rang ai shab-e-hijran na tha kabhi

tha lutf-e-wasl aur kabhi afsun-e-intizar

yun dard-e-hijr silsila-jumban na tha kabhi

pursan na tha koi to ye ruswaiyan na thin

zahir kisi pe haal-e-pareshan na tha kabhi

har-chand gham bhi tha magar ehsas-e-gham na tha

darman na tha to matam-e-darman na tha kabhi

din bhi udas aur meri raat bhi udas

aisa to waqt ai gham-e-dauran na tha kabhi

daur-e-KHizan mein yun mere dil ko qarar hai

main jaise aashna-e-bahaaran na tha kabhi

kya din the jab nazar mein KHizan bhi bahaar thi

yun apna ghar bahaar mein viran na tha kabhi

be-kaif be-nashat na thi is qadar hayat

jina agarche ishq mein aasan na tha kabhi