mahsharistan-e-junun mein dil-e-nakaam aaya

mahsharistān-e-junūñ meñ dil-e-nākām aayā

naala hañgāma-navāzī pe sar-e-shām aayā

mehr az-rū-e-muallā jo lab-e-bām aayā

dekhiye dekhiye ab dhuup ga.ī ghaam aayā

barq kī sho.ala-navāzī sabab-e-tūl-e-hayāt

fitrat-e-maut tirī ziist kā hañgām aayā

muntashir ho ga.e jis vaqt sab ajzā-e-hayāt

qatra dariyā meñ ba-andāza-e-anjām aayā

tausan-e-umr-e-gurezāñ kī subuk-raftārī

kaam detī nahīñ jab maut kā paiġhām aayā

markaz-e-rūh ye hai kashmakash-e-maut-o-hayāt

phir bhī vāraftagī-e-shauq pe ilzām aayā

maiñ vo āsūda-e-soz-e-ḳhalish-e-mizhgāñ huuñ

jis ko rāh-e-talab-e-shauq meñ ārām aayā

tuur se ik kashish-e-mashq thī sūrat-gar-e-shauq

tujh par ai vādī-e-aiman abas ilzām aayā

sard-mehrī se kisī ko jo huī hājat-e-ġhusl

garm-joshī ko baġhal meñ liye hammām aayā

zulf ke jaal meñ ma.ashūq kā sar hai ḳhud bhī

qaidiyoñ muzhda ki sayyād tah-e-dām aayā

qabr se rāsta sīdhā hai ḳhudā ke ghar kā

jo udhar jaane lagā bāñdh ke ehrām aayā

hai agar naam isī kā adbiyāt-e-latīf

to 'zarīf' is ko kaheñ kyā jise ye kaam aayā

mahsharistan-e-junun mein dil-e-nakaam aaya

nala hangama-nawazi pe sar-e-sham aaya

mehr az-ru-e-mualla jo lab-e-baam aaya

dekhiye dekhiye ab dhup gai gham aaya

barq ki shoala-nawazi sabab-e-tul-e-hayat

fitrat-e-maut teri zist ka hangam aaya

muntashir ho gae jis waqt sab ajza-e-hayat

qatra dariya mein ba-andaza-e-anjam aaya

tausan-e-umr-e-gurezan ki subuk-raftari

kaam deti nahin jab maut ka paigham aaya

markaz-e-ruh ye hai kashmakash-e-maut-o-hayat

phir bhi waraftagi-e-shauq pe ilzam aaya

main wo aasuda-e-soz-e-KHalish-e-mizhgan hun

jis ko rah-e-talab-e-shauq mein aaram aaya

tur se ek kashish-e-mashq thi surat-gar-e-shauq

tujh par ai wadi-e-aiman abas ilzam aaya

sard-mehri se kisi ko jo hui hajat-e-ghusl

garm-joshi ko baghal mein liye hammam aaya

zulf ke jal mein mashuq ka sar hai KHud bhi

qaidiyon muzhda ki sayyaad tah-e-dam aaya

qabr se rasta sidha hai KHuda ke ghar ka

jo udhar jaane laga bandh ke ehram aaya

hai agar nam isi ka adbiyat-e-latif

to 'zarif' is ko kahen kya jise ye kaam aaya